• Impartiranse un total de seis sesións informativas con nocións para mercar de xeito seguro na rede ou para a realización de diversos trámites.

A aula CeMIT de Guitiriz acollerá neste mes de maio un ciclo integrado por seis charlas nas que se divulgarán nocións sobre diversos procedementos en liña.

O programa dará comezo o martes, 3 de maio, cunha sesión de 10.30 a 12.00 horas, onde se achegará información para empregar a banca dixital dunha forma segura, e, nesta mesma liña, o xoves, 5 de maio, en horario de 12.00 a 13.00 horas, terá lugar a segunda cita, na que se abordarán os novos métodos de pago entre os que se inclúen bizum, pago por móbil, tarxeta revolving e as criptomoedas.

O ecuador do ciclo chegará o luns 9 de maio cunha nova charla onde se porá sobre a palestra consellos para mercar de xeito seguro na rede. A cita terá lugar desde as 10.30 ata as 11.30 horas.

A programación retomarase o mércores 18 cunha ponencia para abordar o papel da publicidade, de 12.00 a 13.00 horas e un día máis tarde, o xoves 19, de 10.30 a 12.00 horas, será quenda para coñecer máis de preto o emprego e a utilidade do DNIE, o certificado dixital e o sistema cl@ve.

O martes 24 de maio pecharase o ciclo cunha sesión para facilitar a realización de xestións en liña coa administración pública, en horario de 10.30 a 12.00 horas.

Inscricións

As prazas para acudir ás charlas serán limitadas polo que as persoas interesadas deberán anotarse previamente chamando ao 982 370 062 ou a través do correo cemit.guitiriz@xunta.gal