Unha iniciativa do Concello de Guitiriz para mellorar a convivencia cidadá, garantir o benestar animal e favorecer unha xestión responsable dos gatos comunitarios.
Colonias felinas
Programa de xestión de colonias felinas en Guitiriz
Que é unha colonia felina controlada?
Unha colonia felina controlada é un grupo de gatos comunitarios que viven en liberdade, vinculados a un territorio onde atopan os seus recursos de subsistencia.
A súa xestión permite coidar o seu benestar, controlar a poboación de forma responsable e reducir posibles molestias na contorna.
Estes gatos non deben ser trasladados nin manipulados pola veciñanza. Son animais territoriais e a súa xestión debe realizarse mediante persoal autorizado e seguindo o programa municipal.
Por que se xestionan as colonias felinas?
As colonias sen control poden xerar conflitos veciñais, restos de comida na vía pública, cheiros, ruídos en época de celo e un aumento continuado de camadas.
A xestión municipal busca unha solución ética, ordenada e efectiva: protexer os animais, mellorar a hixiene dos puntos de alimentación e favorecer unha convivencia máis tranquila entre a veciñanza e os gatos comunitarios.
Método CES: capturar, esterilizar e soltar
O método CES permite controlar a poboación felina sen retirar os gatos do seu territorio. Realízase mediante capturas seguras, intervención veterinaria e retorno á colonia de orixe.
Captura
Os gatos son capturados con medios seguros e non lesivos, evitando a súa manipulación directa e reducindo o estrés.
Esterilización
Un profesional veterinario realiza a intervención, o control sanitario correspondente e a marcaxe identificativa.
Solta
Tras a recuperación, o gato volve á súa colonia de orixe, onde continúa baixo supervisión do programa.
Beneficios do programa
Unha colonia controlada non só mellora a vida dos gatos. Tamén axuda a manter unha contorna máis limpa, organizada e segura para a veciñanza.
Control poboacional
Fréase o nacemento de novas camadas e redúcese progresivamente o número de gatos.
Menos moléstias
Ao estar esterilizados, diminúen os miaños nocturnos, as pelexas e a marcaxe con ouriños.
Hixiene e limpeza
A alimentación faise en puntos controlados, evitando restos de comida espallados pola rúa.
Control sanitario
Os gatos pasan por revisión veterinaria, desparasitación e seguimento dentro do programa.