O domingo 30 de marzo dará comezo a sétima edición do programa municipal de sendeirismo ‘Guitiriz en Ruta’, que nesta ocasión constará de oito andainas e rematará o 21 de decembro de 2025.

A Ruta do Muíño da Ruxida será a primeira saída deste ano. Está programada para o domingo 30 de marzo, con saída a partir das 10:00 horas desde A Modia, na parroquia de Vilar. Posteriormente, e exceptuando nos meses de xullo e agosto, haberá un roteiro por mes por distintos percorridos, tres polo municipio, que terán inscrición gratuíta, e catro en distintos concellos, que terán un custe de 5 euros para empadroados e de 10 euros para non empadroados.

As inscricións realizaranse de xeito presencial na Casa do Concello ou por teléfono, chamando ao 982 370 109, antes das 15 horas do xoves anterior á ruta de sendeirismo programada. Todos os percorridos están abertos ao público en xeral.

Completan o programa as seguintes sete saídas: Ruta do Río Mera no Concello de Lugo (27 de abril), Camiños de Caión en A Laracha (domingo 11 de maio), Ruta da Cova da Serpe (8 de xuño), Camiño Natural da Ruta do Cantábrico Etapa 7 (28 de setembro), Ruta das Bidueiras en San Breixo (26 de outubro), Ruta dos Muíños do Río das Gándaras no Concello de Vilasantar (30 de novembro) e a Ruta do Monte dos Vilares (21 de decembro).