Preto de 230 persoas participarán este domingo, 19 de abril, na XVI Carreira Popular e V Andaina Concello de Guitiriz Termal, organizada polo Concello en colaboración co Club Atletismo Guitiriz e co apoio da Deputación de Lugo.

A proba desenvolverase co Campo da Feira como punto neurálxico da xornada, reunindo participantes de todas as idades. Como principal novidade, nesta edición as actividades celebraranse en horario de mañá.

A xornada comezará coa saída da andaina, de nove quilómetros, ás 10:00 horas, mentres que as carreiras darán comezo a partir das 12:00 horas, incluíndo percorridos adaptados para as categorías de menores e unha carreira absoluta de cinco quilómetros. A entrega de premios está prevista arredor das 13:30 horas.

Como é habitual, o evento contará tamén cun compoñente solidario, xa que 1 euro de cada inscrición destinarase á asociación Somos Unidos Contra el Cáncer, ademais do recadado coa fila cero para achegas voluntarias, aínda que esta modalidade non permitirá participar na proba deportiva.

Poderase realizar a inscrición o mesmo día da proba, con prezos de 10 euros para a carreira e de 5 euros para a andaina. A recollida de dorsais e chips efectuarase ese mesmo día entre as 10:30 e as 11:30 horas no Campo da Feira.

Habilitaranse diversos servizos, como duchas no Pavillón Municipal a partir das 12:30 horas, amplas zonas de aparcadoiro nas inmediacións, servizo de ambulancia con médico no Campo da Feira e avituallamento con auga e froita, ademais dun agasallo para todas as persoas participantes.

Desenvolvemento da proba

A primeira actividade será a andaina, aberta a todas as idades e cun percorrido de 9 quilómetros, con saída ás 10:00 horas. A partir das 12:00 horas darán comezo as carreiras, distribuídas en 12 categorías: a categoría biberón sairá ás 12:00 horas cun percorrido de 200 metros; as categorías Sub10 e Sub12 sairán ás 12:10 horas e realizarán 800 metros; as categorías Sub14 e Sub16 terán saída ás 12:30 horas cun percorrido de 1.560 metros; e a carreira absoluta disputarase ás 12:45 horas cunha distancia de 5.000 metros.

Na carreira absoluta entregaranse trofeos ás tres primeiras persoas clasificadas, e tamén haberá recoñecementos para os tres primeiros clasificados das categorías Sub18, Sub20, Sénior, Máster 1, Máster 2 e Máster 3. A entrega de premios está prevista arredor das 13:30 horas.

Dispositivo de tráfico

Con motivo da celebración da proba, establecerase un dispositivo especial de tráfico. Estará prohibido estacionar o domingo 19 de abril entre as 7:00 e as 14:00 horas na marxe esquerda (sentido baixada) da Rúa Río Forxá e na contorna da Praza do Campo da Feira, concretamente na fronte da praza e no lateral dereito da igrexa.

Ademais, cortarase o tráfico na Praza do Campo da Feira, na Rúa do Mercado e na Avenida Poeta Díaz Castro (desde a Praza do Campo da Feira ata a intersección co Paseo dos Sete Muíños) entre as 11:00 e as 14:00 horas. Tamén haberá cortes temporais no Paseo dos Sete Muíños e na Rúa As Costaneiras durante ese mesmo período.

Nas rúas afectadas polos cortes permitirase o estacionamento de vehículos, agás nos puntos sinalados, aínda que non se poderá circular mentres dure a restrición do tráfico.