O Concello de Guitiriz deu a coñecer hoxe o cartel oficial da IX Festa da Torta de Millo, que terá lugar o próximo domingo 7 de xuño. A imaxe deste ano adianta parte da programación dun evento xa consolidado no calendario festivo da comarca, no que non faltarán artesáns, exposicións, música, obradoiros, xogos populares e, por suposto, a degustación e venda da tradicional torta de millo de Guitiriz.

O evento, organizada polo Concello coa colaboración da Deputación de Lugo, contará nesta edición con dúas destacadas actuacións musicais que reforzan a aposta pola cultura galega.

Por unha banda, subirá ao escenario Sheila Patricia, unha das voces máis salientables da nova canción de autora. O seu estilo mestura tradición oral, folclore e música de raíz con sons contemporáneos e electrónicos, cunha proposta artística marcada pola poesía e o empoderamento feminino.

Por outra, o público poderá gozar de Caamaño e Ameixeiras, dúo formado por Sabela Caamaño e Antía Ameixeiras. Desde o seu debut en 2018, consolidáronse como unha referencia da música de raíz galega, cunha traxectoria que transcende fronteiras. A súa proposta combina respecto pola tradición cunha linguaxe propia, a través de composicións e arranxos que dialogan co legado popular incorporando elementos contemporáneos.

O Concello de Guitiriz irá desvelando nas vindeiras semanas novos detalles da programación completa desta novena edición, que promete volver converter a vila nun punto de encontro para a cultura, a tradición e a gastronomía galega.