O Concello de Guitiriz converterase os vindeiros 19, 20 e 21 de xuño no epicentro do automobilismo galego coa celebración do I Rallymix Concello de Guitiriz – Gran Premio Deputación de Lugo, unha nova competición que chega ao municipio coa vocación de consolidarse como unha referencia deportiva dentro do calendario galego do motor.

A proba, organizada por Scratch Galicia e a Escudería Scratch Fene coa colaboración do Concello e da Diputación, situará Guitiriz no mapa do automobilismo autonómico cunha proba que destaca por ser única na provincia, reforzando a aposta do Concello pola promoción de eventos deportivos de relevancia.

A competición desenvolverase sobre un tramo cronometrado de 9,08 quilómetros que combinará superficies de terra e asfalto, ofrecendo un importante atractivo tanto para os equipos participantes como para os numerosos afeccionados ao motor que se agardan durante a fin de semana.

Programa e inscricións

O programa arrancará o venres 19 de xuño coas verificacións administrativas e técnicas opcionais. O sábado 20 celebraranse as verificacións oficiais, os recoñecementos e as tres primeiras mangas cronometradas, rematando a xornada coa entrega de premios do “Súper Sábado”. Xa o domingo 21 disputaranse as dúas pasadas finais e a posterior entrega de premios da clasificación xeral.

As inscricións para participar xa están abertas a través da plataforma PODIUM. O prazo permanecerá activo ata o luns 15 de xuño ás 20:00 horas e a organización estableceu un límite máximo de 100 vehículos inscritos.

Premios en distintas categorías

O I Rallymix Concello de Guitiriz será puntuable para os campionatos e copas de Galicia de Rallymix 2026 e contará cunha dotación económica superior aos 6.300 euros entre as Clases A e B e un novidoso premio para os vencedores do sábado; o I Trofeo Súper Sábado Panadería La Esquina, para os vencedores das sete agrupacións nas que se dividirán os inscritos.

Ademais, incluirá diversos trofeos especiais destinados a recoñecer o talento en distintos apartados e dotados con 300 euros cada un a dividir entre os tres primeiros clasificados (150 euros, 100 euros e 50 euros). Estes serán o Trofeo Feminino Pub Zeus (para as mellores pilotas), o I Trofeo Junior Guitiriz Racing Detailing (para menores de 25 anos), o I Trofeo Máster Pub SOA (para maiores de 45 anos), o II Trofeo Pilotos Lucenses Carnicería Vitorio (para poñer en valor o talento local da provincia) e o I Trofeo Scratch Fene Pub Titanic (exclusivo para os membros da escudaría organizadora).

Toda a información oficial da competición, os tempos en directo e os avisos da organización poderán consultarse a través da aplicación SPORTITY, empregando a clave GUITIRIZ26.