O Concello de Guitiriz celebrou este xoves, 21 de maio, unha nova edición da tradicional Festa dos Xubilados e Xubiladas, unha cita xa consolidada no calendario social do municipio que reuniu no Pavillón Municipal Jonathan Carro Paz a arredor de medio millar de persoas maiores de 65 anos.

A xornada desenvolveuse nun ambiente de convivencia e celebración, nun evento pensado para render homenaxe ás persoas maiores de Guitiriz e recoñecer o seu papel fundamental na vida social do concello.

Ao acto asistiron a alcaldesa de Guitiriz e deputada de Muller e Igualdade, Marisol Morandeira, así como integrantes da corporación municipal, que compartiron a celebración coas veciñas e veciños participantes.

As persoas asistentes desfrutaron dun xantar de confraternidade que deu paso a unha tarde festiva marcada pola música, o baile e o tradicional sorteo de agasallos. A actuación musical de Nerea Cobas puxo o ritmo á celebración e converteu o pavillón nun espazo de encontro e diversión, nunha cita que volveu destacar pola elevada participación.

A alcaldesa, Marisol Morandeira, agradeceu a presenza de todas as persoas participantes e destacou “a importancia de manter e fortalecer este tipo de encontros, que permiten compartir tempo, experiencias e momentos especiais coa nosa xente maior”.

Ademais, a rexedora sinalou que “as persoas maiores son unha parte esencial da historia e da identidade de Guitiriz, e desde o Concello seguiremos impulsando iniciativas que fomenten o envellecemento activo, a convivencia e o recoñecemento ao labor de toda unha vida”.