O Concello de Guitiriz ultima os preparativos para a celebración do Entroido, unha das festividades máis destacadas do municipio, que este ano contará con máis de 1.600 euros en premios achegados polo Concello e pola Asociación Xermolos.

A celebración terá lugar o martes 17 de febreiro e dará comezo ás 18:00 horas co tradicional desfile de Entroido, que sairá desde a Escola Habanera en dirección ao Pavillón Municipal Jonathan Carro Paz, onde continuará a festa unha vez finalizado o percorrido. O desfile estará amenizado pola música de Bloquinho de Xermolos, que poñerá ritmo e animación á xornada.

No marco da programación celebrarase o II Concurso de Disfraces e Comparsas ‘Premio Especial Concello de Guitiriz’, organizado polo Concello de Guitiriz, que nesta segunda edición consolida esta cita como unha festa de tradición popular orientada a fomentar a participación activa, creativa e interxeracional da veciñanza.

O certame contará con tres modalidades de participación e cunha dotación económica total de 1.245 euros, superando a contía da edición anterior. As comparsas, formadas por seis ou máis participantes, poderán optar a un premio de 620 euros; os grupos, integrados por entre dúas e cinco persoas, a un premio único de 375 euros; e a categoría individual, cun único participante, a un premio de 250 euros.

O prazo de inscrición permanecerá aberto ata o luns 16 de febreiro de 2026 ás 14:00 horas. As bases poderán consultarse na páxina web municipal e as inscricións formalizaranse de maneira presencial no Rexistro do Concello ou de forma telemática a través da Sede Electrónica do Concello de Guitiriz.

A Asociación Xermolos tamén repartirá varios premios

A Asociación Xermolos tamén repartirá premios co obxectivo de recoñecer o espírito máis festivo da celebración. A entidade distinguirá con 100 euros e unha cesta con produtos típicos do Entroido a cada comparsa premiada pola súa música, humor e traballo colectivo e, ademais, concederá tres premios de 50 euros aos Mecos máis chamativos. Para optar a estes recoñecementos será necesario enviar unha fotografía dos Mecos ao enderezo electrónico xermolos@xermolos.org para comunicar a súa existencia.