O Concello de Guitiriz e o Club Btteiros Cova da Serpe presentaron os seis itinerarios que formarán parte da oitava edición do programa ‘BTTeando por Guitiriz’ para este ano 2026, unha iniciativa xa consolidada no municipio e que adoita contar cunha ampla participación en cada saída.

Co obxectivo de incentivar a práctica deportiva e hábitos de vida saudables, o programa recolle varios itinerarios de dificultade sinxela polos arredores do concello, fomentando a actividade física, a conexión coa natureza e o desenvolvemento sostible.

Nesta ocasión, a iniciativa impulsada conxuntamente polo Concello e o Club Btteiros Cova da Serpe contará con seis saídas ao longo do ano: tres antes do verán e outras tres despois.

A primeira terá lugar este mesmo mes de marzo, o día 22, coa Ruta da Cova da Serpe. Posteriormente celebraranse o Btteando polo Pantano (12 de abril), a Ruta do Cordal (24 de maio), Btteando por Roca (18 de outubro), a Ruta de Gravel (15 de novembro) e o Btteando de Nadal (13 de decembro).

A organización lembra que é obrigatorio o uso de casco e recomenda levar unha peza de froita e auga. Ademais, cómpre lembrar que pode haber cambios nas datas debido ao mal tempo ou a outras causas xustificadas; de producirse, avisaríase coa maior antelación posible.

Todas as persoas interesadas nos diferentes itinerarios poden inscribirse no Concello ou a través do Club Btteiros Cova da Serpe ata o xoves anterior a cada ruta. As rutas son de balde.