O Concello de Guitiriz organiza a formación ‘Comprender para acompañar. Como previr e actuar ante condutas de risco e autolesivas’, unha iniciativa dirixida a familias, profesorado e público en xeral interesado no benestar emocional da mocidade.

A actividade terá lugar o mércores 13 de maio, en horario de 16:30 a 18:30 horas, no IES Poeta Díaz Castro. A participación é de balde, se ben será preciso realizar inscrición previa a través dun formulario en liña habilitado na páxina web e nas redes sociais municipais.

A proposta está organizada polo Concello de Guitiriz coa colaboración do IES Poeta Díaz Castro e da entidade Ludus Tempori. Esta charla enmárcase nunha campaña de sensibilización que se desenvolverá ao longo dun mes, coa difusión de diferentes contidos informativos baseados nos datos recollidos no último Barómetro da Mocidade, Saúde e Benestar 2025, elaborado pola FAD. A propia charla xirará arredor desta mesma temática, afondando nos principais datos do estudo e ofrecendo claves prácticas para a prevención e actuación ante condutas de risco e autolesivas.

A través de diversas publicacións en redes, o Concello busca achegar á cidadanía información relevante sobre a realidade actual da mocidade, facendo fincapé na importancia da prevención e da detección temperá de condutas de risco.