A Escola Habanera do Concello de Guitiriz acollerá o vindeiro 9 de xuño a formación ‘Seguridade no Fogar’, unha actividade dirixida a coidadores, familiares e persoas interesadas en mellorar a seguridade e a calidade de vida no ámbito doméstico.
A sesión desenvolverase en horario de 16:30 a 18:30 horas e contará cun certificado oficial para todas aquelas persoas que completen a formación, impartida por Olga Roca, enfermeira da Área Sanitaria de Lugo.
Durante a actividade abordaranse diferentes aspectos relacionados coa seguridade e os coidados no fogar, entre eles a adquisición de habilidades e coñecementos necesarios para mellorar a calidade de vida no ámbito familiar, a seguridade na realización das axudas da vida diaria no domicilio, pautas para incrementar a seguridade no fogar e o uso das novas tecnoloxías como ferramentas facilitadoras da seguridade tanto dentro como fóra da casa.
As persoas interesadas en participar poderán inscribirse ata o luns 8 de xuño nos Servizos Sociais municipais, chamando ao teléfono 982 370 109 (Ext. 1).