O programa Concilia Vacacións, impulsado polo Concello de Guitiriz durante os meses de xullo e agosto, chega á súa fin o próximo luns, 31 de agosto, cunha xornada de clausura moi especial para os máis pequenos e pequenas.
Esta cita terá lugar na Escola Habanera dende as 11:00 ata as 13:00 horas. Os nenos e nenas participantes sacarán partido do traballo que desenvolveron ao longo do verán e desfrutarán dunha sesión de xogos de mesa elaborados por eles mesmos con materiais reciclados.
O Concilia Vacacións é unha das accións desenvolvidas no marco do Guitiriz Concilia, proxecto que busca favorecer a conciliación da vida laboral e familiar no Concello. Está pensado para que os nenos e nenas de 3 a 12 anos poidan recibir unha atención de calidade mentres seus pais e nais traballan, tanto durante a época lectiva como no verán, con actividades educativas e de lecer.
Agardamos por vós para poñer o broche de ouro a un verán cheo de diversión.