Guitiriz viviu este mércores unha xornada especial con motivo da eclipse solar, cunha programación que combinou divulgación científica, música e natureza e que converteu a parroquia de Santa Mariña nun dos puntos de encontro para gozar deste acontecemento astronómico.
A Romaría da Eclipse Solar, organizada polo Concello de Guitiriz, comezou ás 19:00 horas no Campo da Festa coa actuación de Soul&Roll, que puxo a banda sonora no principio dunha tarde marcada pola expectación ante o fenómeno.
Ás 19:30 horas, a actividade trasladouse ata o monólito Irmáns da Lexía, onde veciñanza e visitantes participaron na observación guiada da eclipse. Durante o fenómeno, o público contou con explicacións divulgativas sobre as diferentes fases e momentos do acontecemento astronómico.
O Concello facilitou gratuitamente lentes homologadas para a observación solar, proporcionadas pola Deputación de Lugo, co obxectivo de garantir unha contemplación segura do fenómeno.
Unha vez superado o momento central da eclipse, a música regresou ao Campo da Festa coa continuación da actuación de Soul&Roll, incluída no programa Cultura no Camiño de AGADIC.
A celebración permitiu poñer en valor o patrimonio natural de Santa Mariña e ofrecer unha alternativa de lecer arredor dun fenómeno astronómico de especial relevancia. A combinación da observación científica cunha programación musical ao aire libre contribuíu a crear unha experiencia pensada tanto para o público local como para as persoas chegadas desde outros puntos de Galicia.