Este domingo deu comezo a sexta edición do programa de sendeirismo ‘Guitiriz en Ruta’. Fíxoo cunha andaina pola Ruta a Auga na que participaron máis de 40 persoas.

A actividade comezou ás 10:00 horas, no CIT de Parga, de onde arrancou o percorrido. Dende alí, os/as camiñantes saíron en dirección a San Alberte, onde fixeron unha pequena parada para descansar. A volta realizárona polo Camiño Norte de Santiago, pasando pola igrexa e Parga para completar os 13 quilómetros do percorrido.

A alcaldesa de Guitiriz, Marisol Morandeira, recibiu aos participantes á súa chegada a Parga. Agradeceulles a súa participación na actividade e aproveitou para lembrar o resto da programación de saídas.

O ‘Guitiriz en Ruta’ consta dunha andaina por mes, das que cinco son polo municipio, que son gratuítas, e as outras tres noutros concellos, que teñen un custe de 5 euros para empadroados e de 10 euros para os non empadroados. A seguinte saída será o domingo 25 de febreiro e percorrerase a ruta do río Mera, en Lugo.

As inscricións realizaranse de xeito presencial na casa do concello ou por teléfono no 982 370 109 ata as 15 horas do xoves anterior á ruta de sendeirismo programada.

Todas as saídas están abertas ao público xeral que teña unhas condicións físicas mínimas para poder camiñar varios quilómetros. Completan a programación: o Camiño Vello de Aldosendo en Paradela (domingo 24 de marzo), coñecendo a parroquia de Mariz (domingo 28 de abril), a ruta da Pedra de Díaz Castro nos Vilares (domingo 26 de maio), camiñando entre provincias (domingo 27 de outubro), a ruta do Río Mendo en Oza dos Ríos e Betanzos (domingo 24 de novembro) e a ruta do Río Requeixo (domingo 22 de decembro).