Este xoves, 5 de xaneiro, volve a Guitiriz a tradicional cabalgata dos Reis Magos, organizada polo Concello e a Asociación Xermolos.

As Súas Maxestades de Oriente comezarán a ruta ás 15:30 horas desde o Campo da Feira de Parga e ás 16:30 horas entrarán pola Ponteveiga para chegar ata a casa do concello, onde os recibirá a alcaldesa, Marisol Morandeira.

Trala recepción, os Reis Magos trasladaranse ao Campo da Feira onde atenderán as peticións dos máis pequenos dentro do iglú instalado no Mercado de Nadal. A festa estará animada por Bloquinho de Xermolos e a Escola de Música Tradicional de Xermolos, composta polo grupo infantil, o grupo de gaitas e baile e os cantos de taberna.