O Concello de Guitiriz presentou hoxe o seu ‘Ludinadal’, alcume baixo o que se levará a cabo a programación municipal de actividades para o Nadal e que incluirá opcións como patinaxe sobre xeo, inchables, obradoiros e outras.

A programación dará comezo o 23 de decembro e rematará o 7 de xaneiro. Na praza do Campo da Feira instalarase a pista de xeo e os inchables, que permanecerán durante todas as xornadas en horario de 10:30 a 21 horas.

Ademais, no mesmo lugar cada tarde haberá diferentes obradoiros (postais de Nadal, de educación viaria, de chapas de Nadal, pasatempos, adornos de Noite Vella, globoflexia, reciclaxe…) e outras opcións de entretemento como xogos xigantes, xogos musicais, xogos tradicionais, un simulador de surf ou un espectáculo de maxia.

O 23 de decembro o Apalpador visitará Guitiriz para coñecer os desexos dos máis pequenos e para o 5 de xaneiro o Concello decidiu non programar ningunha actividade xa que está a agardar aos Reis Magos de Oriente, que aínda non confirmaron a súa visita.

A alcaldesa de Guitiriz, Marisol Morandeira, explicou que “optamos por ofrecer un amplo programa de actividades para o Nadal xa que se levarán a cabo dun xeito seguro, con grupos reducidos, respectando o aforo e todas as medidas de prevención marcadas polas autoridades sanitarias”.

Podedes consultar a programación do ‘Ludinadal’ aquí.